وطني

كم عشت غريبا فيك يا وطني
أحلم بيوم فيه ألقاك
تأخذني فيه بين أحضانك
وتحتسبني من رعاياك
أربع وعشرون عاما هو عمري
...كم دعوت الله أن يرعاك
أربع وعشرون عاما تظلمني
تتمني لو تحطمني بين ثناياك
وكأنني عار عليك
أو أن دمي لم يختلط بثراك
هل نسيت يا وطني ؟؟؟
أن أبي هو من حماك !!!!
وأن من بنوك هم أجدادي ؟
وأنني أنا من سيسرع خطاك ؟
أم قد غصبت علي كرهي ؟
من سارقي ثرواتك وواثبي أحشاك
أم ملأوا ترابك بحقد يلفظني
كلما سعيت لأسمو بعلاك
وبرغم كرهك لإسمي ودمي
لم أبتغي وطنا سواك

أخبرني يا وطني مين اللي باقيلك
ومين فوقت الشدة تندهله جاريلك
ومبن اللي أبوه من النجمة روي وزرع طينك
مين اللي أمه بتسجد لله وتدعيلك
مين اللي لم أصحابه ونور قناديلك
وسهروا طول الليل يحموا أراضينك
ومين فسنين الجفاف واقف يصليلك
ومين بدمه رواك لما يبس نيلك
ومين بأعوام الرخاء يعمر ويبنيلك
ومين اللي خانك واتهمني إني ببيع طينك
وظلمني وأهاني وحبسني في زنازينك
وعمره ما فرط فـ جلدي ولا حتي أستحي جلادينك
وانت بتنزف يوماتي ولا هما حاسينك
وبتشكي وتئن ليلاتي ولا حتي سامعينك
ولما صوتك علي . ولما دمك غلي ... قطعوا شرايينك
متقولي يا وطني مين اللي باقيييييييييلك
أنا اللي باقيلك !!!!!!!!!!!!!!!!!!

أنا اللي زرعك أبويا وجدودي بدماهم
ولما كبرت وقويت أنا كنت وياهم
ولما الأعادي هانوك حاربت أنا معاهم
وبإيدنا زرعنا النار بأرضهم وسماهم
أنا نفسي بس أفهم مين اللي غلاهم
مين اللي باعني رخيص لاجل ما ينول رضاهم
مين اللي مرر دنيتي وحلي دنياهم
مين اللي حنن عليهم وعليا قساهم
متقولي يا وطني مين اللي خلاهم
يهشموا ظلوعي مابين ثناياهم
ويهدموا حلمي وأنا عيني شايفاهم
ويدوسوا علي أرضك ولا حاجة منعاهم
وكل حبة فرملك كارهة ولعناهم

إصحي وفوق يا وطن دي غمة وانزاحت
كلابهم نجست طينك والرملة دي عانت
والشجر جفت جذوره وزرعتي ماتت
والورد دبلت وروقه ولونه بقي خافت
كل الطيور في السما حتي الوحوش خافت
ظلموا جميع البشر حتي الصخور دابت
لكن خلاص يا وطن كل الصعاب فاتت
كنا تايهين في ظلمة و ليلنا كان ثابت
كنا عايشين في عتمة حتي البياض باهت
والضحكة كانت ممنوعة ومن شفانا البسمة تاهت
والصرخة بصدورنا مكتومة وبعيوننا الدمعة ماتت
كانت عصابة بتنهب وريحتها أهي فاحت
تلاتين سنة يا وطن لكن خلاص راحت

مش عايز أسف منك ولا عايزك تقول أعذار
عارف كان غصب عنك تكويني بلهيب النار
سامحتك لإني بحبك وبوصفي الابن البار
بحلف يا أرض بلادي لا يمكن تشوفي دمار
راجع عشان أبنيلك واقولك كمان أشعار
هرجع واغني باسمك واعزف علي الأوتار
هعزف واغني بعودي وطني طلعله نهار